L’auteu du mais: châque mais en 2015 j’allons bliodgi des textes d’un auteu Jèrriais. Not’ auteu du mais d’Janvyi est Elie (EJ Luce 30/1/1881-21/10/1918).

Author of the month: each month in 2015, we’ll be blogging texts by a Jèrriais author. Our author for the month of January is Elie (EJ Luce 30/1/1881-21/10/1918).

Né v’chîn l’texte d’aniet d’not’ auteu du mais, Elie:

Here’s today’s text by our author of the month, Elie:

Ch’est tréjous l’habitude au jour de l’an
D’faithe des rêsolutions,
Un chatchun promèt d’amender ses dithes,
Ses gestes et ses actions.
Coumme ou l’savez, une fais n’est pas couotume
Et v’la tchi n’couôte pas rein
D’faithe des promesses d’amendement, quand nou sait
Qu’i n’verront pas l’lendemain!

Pourtant, dites-mé, si ch’est qu’chatchun voulait
Faithe tout chein qu’i’ promèt,
Eche que notr’ monde ne s’trouvthait pon changi?
N’s’sait-i’ pon pus parfait?
Quand par exempl’ye, une femme plièrcheuse vos dit
Qu’ou s’lev’tha du matin
Et graietha l’dêjeuner; – tchi belle promesse
– S’ou voulait bein la t’nin!

Et pis touos l’s’hommes qui sont dêterminès
De tchitter à mâchi,
De n’mettr’ pus jamais l’pi dans une auberge,
Dé n’juther, ni n’gagi;
D’rapporter, l’Sam’di, touos lus sous siez yeux;
Ah! si ches-là voulaient
Respecter lus pathole du jour de l’An,
Coumme lus femmes les aim’thaient!

Touos les docteurs tchi promettent “de dghethi,
Sans faithe servi d’brioche”;
Les bicyclistes “qui n’vos êcras’sont pus
Sans même sonner lus clioche”;
Les domestiques “qui n’ithont pus au cidre
A tout moment, sans l’dithe”; –
Ah s’ou voulez faithe tout ch’qu’ou promettez,
Bouannes gens, que j’vos admithe!

Elie
Prumi d’Janvi 1909