L’Eisteddfod dé Jèrri fut fondé y'a pus d’chent ans et a prîns pliaiche dépis châque année. I’ y’a tchînze sections dans la fête et châque section a san syllabus à lyi-même et d’s adjudicateurs îndépendants et spécialistes.

Jusqu’en 2021 les langues ‘taient dans la Fête ès Arts en Présentâtion au stembre. Chennechîn a changi et l'Jèrriais et les langues modèrnes sont célébrés duthant eune Fête ès Langues en hivé au mais d’Janvyi.

La section Jèrriaise d’la Fête ès Langues prend pliaiche duthant deux jours et i’ y’en a trais sections; les mousses, l’s êtudgiants adultes et l’s adultes. Les gens chouaîsissent d’eune richesse dé littéthatuthe en Jèrriais et présentent des poésies, d’s histouaithes et des pièches dé thiâtre tch’èrfliéchent la tchultuthe et l’héthitage dé Jèrri. Il' ont à enfachi des calenges d'liéthe à livre ouvèrt, distchuter les nouvelles et prendre part dans les convèrsâtions en pathes.

Des cèrtificaux sont adjugis ès gens et des gângnants d'clâsses peuvent gângni eune coupe.

D’habitude, la Fête d’la Langue Jèrriaise prend pliaiche à la Salle Pârouaîssiale dé St Ouën. Tout comme, au mais d’Janvyi 2021, pouor la preunmié fais dans l’histouaithe d’l’Eisteddfod dé Jèrri, la compétition prînt pliaiche en lîngne pa’ce qué ch’tait împossibl’ye dé s'en d'menter auve eune audience duthant la pandémié Covid-19. La section Jèrriaise ‘tait la seule à s'graie d'même.