Entouor L'Office du jèrriais
Ben Spink
Jèrriais Chef du Sèrvice
Ben a ‘té entchéthinné par les langues toute sa vie, et ch’na c’menchit auve lé Français à l’êcole. I’ travaillit comme maître et spécialiste des langues dans l’s êcoles prînmaithes pouor bein d’s années, épis i’ décidit d’siéthe eune ambition qu’il avait eu d’pis bein longtemps; apprendre la langue Jèrriaise. I’ dit qu’êt’ Chef d’Ensîngn’nie du Jèrriais est ‘la djobbe dé ses rêves’.
Geraint Jennings
Jèrriais Promotion Officer
Geraint Jennings fut né et êl'vé à Saint Hélyi, où'est qu'i' d'meuthe tréjous. Comme ensîngnant d'langues, i' prînt chèrge d'eune clâsse du sé d'vant dé dév'nîn un maît' dans d's êcoles quand l'progranme d'ensîngnage du Jèrriais fut lanchi en 1999. Épis i' d'vînt Offici Assistant du Jèrriais dans L'Office du Jèrriais jusqu'en 2019. Dépis 2019 i' travâle comme Offici pour la Promotion du Jèrriais à L'Héthitage d'Jèrri et auve chenna grée des vèrsions Jèrriaises pouor lé Gouvèrnément d'Jèrri. Il a êcrit, édité et illustré des livres et chenna auve Les Aventuthes d'Alice en Êmèrvil'lie.
Marianne Sargent
Teacher | l'Office du Jèrriais
Marianne est eune maitrêsse d’êcole prînmaithe et eune spécialiste en êducâtion pouor l’s années heûsives. Oulle a un MA en êducâtion pouor l’s années heûsives et oulle a êcrit des livres sus l’sujet pouor Bloomsbury Educational et Practical Pre-School. Marianne joignit l’Sèrvice pouor l’Ensîngnage d’Jèrriais à 2016 pouor apprendre la langue et l’ensîngni dans l’s êcoles prînmaithes.
À c'menchi d'Pâques 2021 ou jouaindra l’Êcole du Pliat Dou pouor m'ner eune pilot'tie, éyou qu’oulle ensîngnétha lé Jèrriais ès êfants des années heûsives jusqu’ à l’année 6.
Charlie Le Maistre
Teacher | l'Office du Jèrriais
Charlot fut êl'vé dans eune fanmil'ye où'est qu'lé Jerriais 'tait pâlé rédguliéthement par san péthe et ses grand-pathents, mais i’ fallait attendre présqué chînquante ans pouor l’apprendre lî-même. Auprès qu’i’finit ses êtudes en thiâtre, Charlot c'menchit à travailli dans l’thiâtre comme un acteur épis i' d'vînt un maître. Charlot est fyi d'san héthitâge Jèrriais et i' veurt faithe sèrvi ses capacités d'thiâtre pouor ensîngni l’Jèrriais.
Aline Cattermole
Teacher | l'Office du Jèrriais
Aline Cattermole fut née en 1978 à Falaise en Nouomandie (France). Falaise est bein connue pouor san marchi du Mouoyen Âge et pouor êt’ la ville dé naissanche dé Dgilliaume lé Conquéthant. Auprès san baccalauréat, Aline êtudgit les langues modèrnes, la lîndgistique et la dgialectologie Nouormande à l’Univèrsité d’Caen (Nouormandie). Achteu Aline est maitrêsse dé Jèrriais et oulle est hardi heutheuse d’ensîngni l’héthitage Nouormand en Jèrri.
MAÎTRES ET MAITRÊSSES
Lé Jèrriais, not’ langue, est bein riche et vivante et il est accessibl’ye à tout l’monde. Apprendre la langue ch’est d’ouvri des portes et ch’na peut t’aîdgi à comprendre not’ siez nous. Pouortchi pon nos jouaindre et happer la louême té-même?
- L'Ensîngn’nie du Jèrriais organise les leçons dans l’s êcoles. J’griyons des livres and des matéthiaux en Jèrriais et j’faisons un tas d’aut’ choses pouor encouothagi la dêveloppement d’la langue.
- S’ous avez autcheunes tchestchions ou s’ous voulez des traductions, des slogans, des noms d’maîsons ou autcheune aut’ chose i’ faut contacter L’Office du Jèrriais.
SAVÊT’-OUS?
- Même en Angliais, les gens d’Jèrri font sèrvi des mots Jèrriais comme côti, brancage, bachîn
- Un tas d’l’histouaithe dé Jèrri est êcrit raîque en Jèrriais - pon en Français ou en Angliais
- Un tas d’mots Angliais ont té adopté en Jèrriais avau les siècl’yes. Mais dé temps en temps la prononciâtion et l’êpelage ont té adaptés.
- Tchiques mots en Jèrriais v’naient des hommes du Nord - comme mielle et hougue