Né v’chîn l’texte d’aniet d’not’ auteu du mais, Henry Luce Manuel:

Here’s today’s text by our author of the month, Henry Luce Manuel:

Que j’saie pardounné – Dieu bénin!
Mais, d’vrai, je n’héq’ pon un enn’min;
Je n’peux qui faire!
Tout-d’mêm’ quand chtila qui m’en veut,
En brav’ hain’ fait tout chet qui peut, –
Drait d’but, – pour niaire, –
J’ai pour li quiq’ sort’ de respect,
Car ov’ li j’sais à qui m’en t’né, –
En gard’ je sais qui faire!

J’aim’ mains le mal-autru qui dit
Que d’son vivant i’ n’a cherchi
Fils d’femme à pliaire;
Et qui tâch’ chla de démontrer
Par, tous à la rond’, déningrer –
Lang’ sale! âm’ naire!
Mais même avec dité ‘ya r’cord:
N’ya pas d’dangi, – chest boe qui mord;
Et nou sait bein qui faire!

J’aim’ mains aquor’ le Caud et Fré, –
Le sien qu’est Chan et Lièvr’ – qui fait
Tout pour tous pliaire:
‘Ya trop de double-fache ilà:
Et si, au fond, – i’ n’songe à ma’ –
Coumm’ j’voudrais l’craire –
Pas mains n’êche Oisé à r’douter.
Mais, – même ichin – ‘ya d’bon, qu’nou sait
Ov’ qui nou z-a à faire!

Mais c’qui fait buolli tout mon sang,
Qui m’effritt’ – qui met tous dédans –
Faisant accraire;
Sus qui, se fiant le moindre miot,
Nou s’perd, – chest un Amin qu’est Mo’ –
Qui laiss’ tout faire, –
Et n’hall’ ni boutt’ quand dangi veint…
D’un tel amin, o! défious bein!!
Car i’ n’ya rein de pière!