Né v’chîn l’texte d’aniet d’not’ auteu du mais, Henry Luce Manuel:

Here’s today’s text by our author of the month, Henry Luce Manuel:

Eun sair men Ame, étreinte par bein rude agonie,
Presque ératée, et s’dréchant quasi contr’ la vie,
Criait: “A l’aide, O Dieu! j’ai peux qu’ma Fouai se meurt…..
Drivé-j’ vers l’Abîme? O préserve-m’en, Seigneur!
A l’aide!”

Sombre – oui! était la vout’ Célest’ chutt’ trist’ Sairée’ –
Ni Leun’ ni Etell’ n’en voulait. Si affubliée
‘Tait alle en deu que, sans veue d’Ecliair – qu’effritait –
Un Ois’lin je n’viyiais, qui à ma f’nêtr’ criait
“A l’aide!”

P’is vint Orag’ qui craulait Rocs, et eun’ Tormente
Qui craquiait Bois, rageait Montagn’s, et faisait fente
Mêm’ dans les Mers – qui s’blanchissaient furieus’s. Et coumme
A chett’ musiq’ – bell’ dans sen horreur – je quiais
Coumme emberchi, j’crus qué – tout dominant – j’ouïais
Pliaint de Nature (O Hommage au Tout Grand!) coumm’ d’ Homme –
“A l’aide!”

* * *

Jour erparaît; nair’ Niet coumm’ Tempête est passée –
P’tit à p’tit Solé brill’. La bounn’ Pliante est restée
Ferme et dret d’but, – à toute épreuv’ – là-Haut pointant;
Et Dieu comprend grand Arbr’ coumm’ ptit’ Flieur li disant,
“Tuès v’nu à m’n’aide!”

Les Montangn’s et les Nuag’s en Paix sont réunis –
Les Louèm’ s et les Roquiers en amour rembrachis; –
Et v’lo qu’mon p’tiot Oisé, plien d’Fouai, erfile en l’air,
Et zieux vers Ciel i’ m’sembl’ l’entendre entonner cliair –
“Tuès v’nu à m’n’aide!”

* * *

…Et mé? l’Ecalle est quaie. Men Am’ – p’us aveuglie –
Ervait un brin. – Nan! Vie sans Pein’ ne s’rait êtr’ Vie.
Oui! Vie, veut dire Epreuv’. Mais oulle a son Lend’main
Quand Tout coumm’ dans la Grand’ Nature se r’trouv’ra Bein.
O Fouai! tu r’veins! – Allaiz! peux, plieurs doute, agonie! –
O Joie! déjà des Cieux j’entends un’ Voix qui m’crie –
“JE VEINS – A T’N AIDE!”