Né v’chîn l’texte d’aniet d’not’ auteu du mais, Ph’lippe Langliais:

Here’s today’s text by our author of the month, Philippe Langlois:

Qui pictures se font les femmes
En mil huit chent septante trais;
Les servantes dgannent les dames,
Ont l’air d’en faire touos les frais.

Dépis les pids jusqu’à la tête
Tout est pus ou mains dêrangi,
Et ch’est surtout les jours de fête
Qu’nouz est à même d’en jugir.

Dêfigurèes et enlaidies
Par un horiblle gros chignon,
Pus bas les hanques sont chergies
D’une espece de gros chiffon.

Combein est qu’il y-a de fllôneresses
Dêpensant pus qu’i’ n’peuvent gangnir,
Qui s’en vont se carrant les fesses
N’sachant s’ils ont cul ou pangnir.

Nou les vait la robe ertroussèe,
Pour exposer lus cotillon
Dont la bordeure est tout ornèe,
Se juquir sus un haut talon.

Le Grecian bend est une sottise,
L’Alexandra limp ocouo pus;
En viyant une itelle bêtise
Nou dit, des marmousets fraient mûx.