Né v’chîn la poésie d’aniet, tch’appathaît ichîn pouor la preunmié fais, d’not’ auteu du mais, Geraint Jennings:

Here’s today’s previously unpublished poem by our author of the month, Geraint Jennings:

D’la vinnaigrette auve eune bouonne dgiêxaine d’hîtres,
deux cocktails, eune boutilyie d’vîn,
du catchet êcalé pouor qué j’achître
deux lèvres à la Saint Valentîn.

Les chandelles trélûthent sus la tabl’ye heunée
et châque assiettée r’sent l’brûlîn;
l’ieau à la bouoche veint en sablion à sé,
êchoué à la Saint Valentîn.

Nou hale au tchoeu auve toute eune bouochie d’flias;
lé doux dêpense parmi l’suthîn;
nou-s’engaûme lé mêgoût du chocolat
amé à la Saint Valentîn

et s’nou-s’ôse d’viser raîque tchiques rares murmuthes,
la fache rouogit, saque un radgîn:
la langue lampe et les douochinn’nies touônnent suthes.
Nou brûle à la Saint Valentîn.