À Béthléhem, les gardeurs dgettent lus brébis
sus les côtis, dans la niet si fraide et néthe.
Mais eune êtaile lit sus la ville dé Dâvi,
et v’là tchi d’vale sus ieux la lueu d’la glouaithe.
Êtailes, êtailes, si cliaithes dans la niet;
Êtailes, êtailes, êcliaithiz not’ Noué!

Un tchoeu céleste a êgalué la séthée;
toutes les êtailes auve eune constellâtion d’anges.
Coumme il’ èrlithent, la mélodie êtailée
pétil’ye à haut pouor înspither nos louanges.
Êtailes, êtailes, si cliaithes dans la niet;
Êtailes, êtailes, êcliaithiz not’ Noué!

Sus lus chanmeaux, ava et amont les mielles
souotre un m’sagi d’là-haut l’avant à lus ièrs.
Viageant tréjous à la siette d’eune grand’ êtaile,
né v’là les Mages tchi veinnent, crouaîsant lé d’sèrt.
Êtailes, êtailes, si cliaithes dans la niet;
Êtailes, êtailes, êcliaithiz not’ Noué!

Par sus la ville, eune êtaile est à mèrtchi
qu’à Béthléhem un Saûveux nous est donné.
Y’a dans l’êtabl’ye dans tchi l’êfant est bèrchi
d’l’enchens, d’la myrrhe, et d’l’or tchi lit si bé.
Êtailes, êtailes, si cliaithes dans la niet;
Êtailes, êtailes, êcliaithiz not’ Noué!