1923: acouo d’s êlections
More election gossip from 1923
Ch’n’est pon des sornettes que j’vas vos raconter annièth mais tchiques histouaithes qui sont la pure, plieine et entièthe vérithèt, fouai de Marie Hibou, et de tchi qui s’passi en Jerri, il y a p’tit d’temps de chunna.Pouor les siens qu’ont l’s’esprits bas n’v’la de tchi les revilletonner, et ch’n’est pon du gnollin mais la vérithèt.* * *Dans la paraisse à mon biau cliochi, Jack l’tcherpentchi était couochi avec sa Missis fut réveillie par un tapement. Oulle n’avait pon rêver pouor seur, et tchès que chunna veur dithe? Est-che un avertissement ou tchique voleur?Un p’tit oprès, n’v’la tapement qui ercouommenchi. La Missis s’levi et avec un gros bâton oulle ergardi souos le lièt et paradi la chambre mais il n’y avait rein.Oulle alli s’ercouochi mais pon moyen d’frumer l’s’yièrs et de douormir et n’v’la l’tapement qui ercouomenche!Chutte fais, ch’est Jack qui s’déhali et viyant qui ly sembliait que chu tapement v’nait d’une grande wardrobe française qui etait dans la chambre il l’ouvrit, ergardi drièthe le linge pouor saver si y’avait tchiqu’un de muchi ou si ch’tait l’cât qui y était enfrumi mais il n’trouvi rein en tout.P’tit temps oprès aver frumi l’wardrobe, n’v’la encouore une fais que l’tapement ercouommenche et pour seur Jack n’avait pon la brelue.Il ouvri à nouviau chutte armoithe ensorcelée et au but d’un p’tit d’temps, dans un vier chapé sus l’ais du haut, y trouvi l’cât couochi!Et l’tapement ch’tait quant l’cât grattait chès puches!Nous en rit accouorre mais tchi nièt pouor Jack et sa Missis!!* * *Ch’tait dans l’temps d’s’élections pouor Députés. Vous dithes dans tchi paraisse qu’l’affaithe s’passi, j’n’voudrais pon; pas pu que j’n’vais vos dithe l’nom d’baptème des siens qui peuvent dithe que chein que j’vos raconte est la pure vérithèt.Nous canvassait viyant qu’nous savait que n’v’la qui serait une forte élection et que tchiques vouais d’pus d’un bord ou d’l’autre frait touote la difference.L’fils du pus gros tcherpentchi d’la paraisse était ieun des canvassers et en faisant une touornée il entri siez ieun d’s’électeurs qui ly avait promins d’voter de san bord. Il n’y avait qu’la Missis qui était à la maison et notre homme en profiti pouor ly d’viser un miot à l’entouour d’l’élection qui s’en aller y aver dans la paraisse. Y fit tant et si bein qu’il en apprins un p’tit pus long que l’buanhomme n’aurait voulu dithe. Enfin y s’décidi d’aller jusqu’à la forge, iou qu’nous ly avait dit que s’trouvait l’sien qui voulait vais et à mi-k’min il le rencontri et ly passi l’compliement disant qu’il était allé siez ly pouor l’vais.Quand chut électeur rentri sièz ly il y eut du sabat et il d’vint si mârri que pendant huit nièts d’suite il alla s’couochi à san tout seu, d’un autre bord d’la maison, et touot chunna viyant les d’vis de sa Missis au sien qu’était v’nu canvasser!J’sais bein mé, que tu liras chunnechin dans la gazette d’annièth et j’sis quassiment seur que l’éternelle Marie Hibou en entendrait d’biaux compliements si oulle etait oprès té mais faut pas s’marri d’même et pouor une affaithe d’élection aller s’couochi à son tout seu, au risque d’aver les pids gelés pendant touote une nièthe, n’en vaut pon la peine; crais mé, touote bête que j’sis…* * *Dans la paraisse iou qui s’en va y aver élection pouor chantgniers, les siens qui n’ont pon touot chein qui lus faut pouor touorner lus terres trouvent touot à buan marchi, même les tractors, s’il vos pliait. Et les siens qui font l’travas n’d’mandent même pon d’gages pouor lus journées!L’autre semaine, à chein que j’ai ouï, nous donnites une séthèe sièz Jonn qui d’meuthe du bord des Pierres de Lecq et qui vend d’tchi bon, aussi bein pouor les siens du blieu ribban que l’s’autres.Oprès l’dinèth, nous décidi d’aver une game d’cartes et viyant que nap couote un miot chi au sien qui perd, nous decidi d’jouer à loup.Quand vint un temps, Douard qui avait perdu tchiques coppers, s’fit qu’il en avait assez et nous décidi d’rentrer dans la paraisse et d’fini la séthée sièz l’couosin Jim.T’chès qu’en pensent l’s’autres?J’reste ès écoutes dans chutte paraisse car n’v’la qui va cauffer raide.J’en aurais bé d’autre à vos raconter… oprès l’élection.* * *L’autre sé l’grand Phlip s’en r’vint d’la ville par le derni train et descendit à la gare du village de Gouarey. Comme y faisait nièt et que la leunne était mucchie notre homme s’en alli touot drait dans le canet.Y faut craithe qui s’criyait au lanchon car lorsque l’on vint pouor ly porter secours y s’mint à insulter touot l’monde! Tchi drôle d’oisé tout d’même.24/2/1923