Né v’chîn l’texte d’aniet d’not’ auteu du mais, Jean Picot (J.P.):

Here’s today’s text by our author of the month, Jean Picot (J.P.):

A.- Assembliée Législative :- en séance nou n’y pâsle qué du Français,
Mais si un membre y crie : “hear, hear!” ch’est-y pon dé l’Angliais?

B.- Barreau :- Escolle dé viède-paûtes – bouanne plièche pour y’i’apprendre
Qué nai’ est blianc, et blianc nai’, et qué viande dure est tendre!

C.- Coumités :- Gens noummés pour méner Projets à bouanne fin,
Mais qu’aiment mûs vais du “rôti” sus table qué du parchémin ;

D.- Dîniers :- ah, les chins qu’y n’y vont pon font grise minne
Et disent qué “Dèspense” veint drièthe ” tchuisinne.”

E.- Escolles Elémentaires :- y couôtent, mais y’i’à t’y soin des frais
Pourvu qué les èsfants y’i’apprennent ben lé français ?

F.- Finances:- ah, v’la un baté mal’ calfêté,
T’chi faût ergrée en hivé coumme en èsté.

G.- Greffe, ou Gouffre, ouqué pus d’un dôtchûment
Attend rêsurrection et jour dé jugement –

H.- Haro:- prièthe qué nou fait quand nou-z-a lé t’chÅ“ur gros,
Mais pour porter chin qu’en sied faut aver bouan dos !-

I.- Impôt:- source ouèq’nou’ puche et tréjous puche,
Ch’est les douze sous par pot t’chi remplent la cruche !-

J.- Jérémïade, poussée par tous quand lé Rât a haûsshi,
Faut trouver des herpins quand nou’ veurt s’embelli-

K.- Kalendes Grecques – ichin. . aide mé, ma plieumme !
Sont-y pon parentes ov’ lé millénium ?

L.- Langue officielle du pays – Langue partout utile :
N’escoutez pon chin qu’en dit lé Recteur dé G…

M.- Municipalité : est composée dé messieux Tel ou Tel,
S’y faut les analyser, allez siez l’Officiel ! –

N.- Nombre Inférieur . – démandez ès Villais dé vos l’explitchi :
Y vos pâsl’ront de Députés, et qu’y’l’en ont trop p’tit ! –

O.- Orateur. – faites un p’tit “speech” quand nou’ z’a cliergi pliats et assiettes,
Et démain ou s’rez noummé dé maîme sus toutes les gazettes;

P.- Prôtets, Procès, Prélats,
Pierres d’achopp’ment dans l’s Etats !…

Q.- Quorum, – forme dans des temps difficile à former :
Bouanne exchuse étout pour membres à s’sauver –

R.- Réforme Radicale :- fille de chorchière – peste d’ervénante !
Nou z’a bieau l’enterrer, ou r’veint tréjous vivante !… .

S.- Salaires :- pain mal divisé – les grands prennent la mie –
Les crôtons seuls restent pour les p’tits –

T.- Trésor : ah, lé garder plyien est tâche pénible,
Nou’ vait tout l’temps lé fond du crible !-

U.- Utopie : rêve d’imagination eslastique,
Chose qué nou’ n’trouve pon en politique!

V – Véto: oh pouvé qu’écrâse lé pus biau projet !
Pourtchi, non dé la vie, inventer d’itet ?

.. Bon v’chin occuo X, Y, et Z !…
Faut les laissi dé côté – not’ fricot erfraide,
Disons, messieux, qué la séance est finie :-
Ergardez l’haûlouêge… y’l’est douze heures et d’mie !